Ол сұхбатта партияның құрылу себебі, жаңа Конституцияның маңызы және алдағы Құрылтайдан күтілетін нәтижелер туралы сұрақтарға жауап берді, деп хабарлайды SHYNDYK.KZ.
Рауан Кенжеханұлының айтуынша, «Әділет» партиясы елдегі жаңа Конституция негізінде қалыптасып жатқан қоғамдық-саяси өзгерістерді жүзеге асыруға бағытталған саяси күш ретінде құрылған.
«Мен Әділетті таңдап қосылған жоқпын, біз Әділетті құрдық. 15 адам бастамашы топ ретінде құрды», – деді Рауан Кенжеханұлы.
Партияны құру туралы шешім алдын ала жоспарланып, бастаманы жүзеге асыруға қоғамдық ұйымдар мен түрлі азаматтық топтар қатысқан.
Сондай-ақ сұхбат барысында ол еңбек жолында түрлі салада жұмыс істегенін айтып, қай салада жүрсе де ел дамуына үлес қосуды басты мақсат санағанын атап өтті.
«Елге қызмет ету үшін міндетті түрде мемлекеттік қызметте болу шарт емес. Қазақстанның азаматы немен айналысса да еліне пайда тигізе алады», – деді кандидат.
Оның сөзінше, «Әділет» партиясының басты ерекшелігі – жаңа Конституцияда бекітілген қағидаттарды нақты іске асыруға ұмтылу. Кандидат партияның басты ұстанымы заң мен тәртіпке, білім мен технологияға сүйенетін әділетті мемлекет құру екенін де атап өтті.
«Біз соның негізгі қозғаушы күші, осы үлкен идеологиялық бағыттың саяси тірегі болғымыз келеді», – деді ол.
Рауан Кенжеханұлы қоғам тарапынан партияға деген қызығушылық жоғары болғанын айтты. Бүгінге дейін жүздеген мың адам партия мүшелігіне өтуге және оны қолдауға ниет білдірген. Кандидаттың сөзінше, халықтың мұндай сенімі партияға үлкен жауапкершілік жүктейді.
Бұған қоса ол партия құрамына кәсіпкерлердің енуіне қатысты пікір білдіріп, ірі өндіріс орындарын басқарып отырған азаматтардың тәжірибесі мен басқарушылық қабілеті партия жұмысына пайдалы болатынын айтты.
Сұхбат барысында Рауан Кенжеханұлы жаңа Құрылтайдың жұмысына да тоқталды. Оның айтуынша, жаңа өкілді орган мазмұны жағынан да, құрамы жағынан да бұрынғыдан өзгеше болады және бүкілхалықтық референдумда қабылданған Конституцияны жүзеге асыратын негізгі институтқа айналуы тиіс.
«Бұл – мазмұны жағынан да, құрамы жағынан да мүлде жаңа Құрылтай. Кәсіби Парламент дегеніміз – оның құрамына заң шығаруға, мемлекеттік мәселелерді талқылауға және туындаған мәселелер бойынша нақты ұсыныс бере алатын азаматтардың келуі. Біз ешкімді шеттеткіміз келмейді. Дегенмен қазіргі партиялық тізімнің бір артықшылығы – Парламент құрамын кәсіби тұрғыдан күшейтуге мүмкіндік береді», – деді ол.
Рауан Кенжеханұлының пікірінше, заң жобаларын талқылау кезінде қоғам пікірі басты назарда болуы тиіс. Бұл – партия жұмысындағы басты қағидалардың бірі. Тіпті, партияның сайлауалды бағдарламасы да халықпен кездесулер барысында айтылған өзекті мәселелер негізінде әзірленген.
«Біздің мақсатымыз – бірінші кезекте қоғам мен мемлекеттің өмір сапасын көтеру. Кез келген мемлекеттік органның да мақсаты – осы. Шын мәнінде, шешілмеген мәселе әрқашан болады. Бұл – өмірдің заңдылығы. Қандай жағдайда да даму мен өзгеріс қажет», – деді Рауан Кенжеханұлы.
Айта кетейік, Рауан Кенжеханұлы жуырда «4Власть» ютуб каналына сұхбат берген болатын.
Дайындаған:
«Әділет» партиясының баспасөз қызметі.
«Әділет» партиясы» ҚБ сайлау қорының қаражаты есебінен төленді.
Тапсырыс беруші: Н.Т. Мыңжасаров.
