Жаңа орталық қаржы жүйесін цифрландыру және жеке құрамға төленетін қаражатты бір жерден есептеу үшін құрылған.
Бұған дейін әскери қызметкерлердің ақшалай қамтылуын, азаматтық қызметкерлердің жалақысын және басқа да төлемдерді әскери бөлімдердің қаржы қызметтері есептейтін. Енді бұл міндет Бірыңғай есеп айырысу орталығына жүктелді.
Жаңа жүйе құжаттарды өңдеу уақытын қысқартып, есептің дәлдігін арттыруға және қателік қаупін азайтуға мүмкіндік береді. Алғашқы өзгеріс те байқалды. Енді Қазақстанның барлық өңіріндегі Ұлттық ұлан әскери қызметшілері ақшалай қамтылымын бір уақытта алады.
Бюджет-қаржы басқармасының бастығы Дәулет Ахметовтің айтуынша, орталық сәуір айында Бас қолбасшылық жанынан құрылған. Қазір бес мемлекеттік мекеме осы жүйеге қосылып, қаржылық операциялар бір шот арқылы жүргізіліп отыр.
Келер жылдан бастап Ұлттық ұланның барлық әскери бөлімін осы орталықтың қызметіне көшіру жоспарланған. Орталық тұрғын үй мен іссапарға байланысты төлемдерді де есептейді. Сонымен қатар әскери бөлімдердегі қаржылық жұмысты біріздендіріп, заңнамадағы өзгерістерді дер кезінде ескеріп отырады.
