Халықаралық құқық қорғаушылардың мәліметінше, режимнің жаңа ережелері ауған әйелдерін іс жүзінде өлімге итермелеп отыр. Әйелдерге ер дәрігерлерге қаралуға тыйым салынған, ал бұл ережені бұзған медицина қызметкерлеріне түрмеге жабылу қаупі төніп тұр. Биліктің қыздарға медициналық білім алуға және емханаларға жаңадан әйел қызметкерлерді жұмысқа қабылдауға әлдеқашан тыйым салуының кесірінен елде әйел дәрігерлер жоқтың қасы, бұл жағдайды одан әрі ушықтыруда.
Ауруханаларда гендерлік сегрегацияның сақталуын тексеретін рейдтер үнемі жүргізіліп тұрады, соның салдарынан әйелдерге тіпті шұғыл реанимациялық көмек көрсетуден бас тартады. Жұмысын жалғастырып жатқан некен-саяқ әйел дәрігерлер де, науқас әйелдер де емханаға тек ер адам-туысының (қамқоршысының) қатысуымен ғана келе алады. Қамқоршысыз әйелді аурухана табалдырығынан аттатпайды.
Денсаулық сақтау сияқты негізгі құқықтан айырумен қатар, жаңа билік әйелдердің жеке басын түбегейлі жоюға кірісіп, оларды өз есімімен атауға ресми түрде тыйым салды. Енді күштік құрылымдар рецепт жазу және медициналық карталарды толтыру кезінде де тек ортақ «бибі» сөзінің пайдаланылуын қатаң бақылауда ұстайды. Бүгінде ауған әйелдерінің алдында екі ғана жол қалды: үйінде емделетін дерттен азапталып өлу немесе жасырын түрде дәрігер іздеп, бостандығын қауіпке тігу.
