Оқиға елордадағы тұрғын үй кешендерінің бірінде болған. Ер адам пәтер иелері кооперативінің (ПИК) кеңсесіне кіреберісте орнатылған бейнебақылау камерасын әдейі зақымдаған. Сонымен қатар домофон жүйесі де бүлінген.
Полиция қызметкерлері құқық бұзушының жеке басын анықтады. Ол 46 жастағы Ерлан Байжарасов болып шықты.
Полиция мәліметінше, ер адам тұрғын үй кешенінің қауіпсіздігін қамтамасыз етуге арналған жабдықты қасақана істен шығарған.
Іс сотта қаралып, ер адамға 10 тәулік әкімшілік қамауға алу жазасы тағайындалды.
Елорда полициясы мұндай құқық бұзушылықтарға қатысты статистиканы да жариялады. Ведомствоның мәліметінше, 2026 жылдың басынан бері Астанада бөтеннің мүлкін бүлдіргені және өзге де бұзақылық әрекеттері үшін 225 адам жауапкершілікке тартылған.
Құқық қорғау органдары бөтеннің мүлкін қасақана бүлдіру заң бойынша жауапкершілікке әкелетінін ескертеді.










