Тікелей рейстерді ашу перспективаларын ҚР Көлік вице-министрі Талғат Ластаев пен АҚШ Көлік министрінің авиация және халықаралық қатынастар жөніндегі көмекшісі Дэниел Дж. Эдвардс талқылады. Кездесу Монреальдағы ИКАО конференциясы аясында өтті.
Қазіргі уақытта Қазақстан АҚШ Федералды азаматтық авиация басқармасының (FAA) 1-санатын алу бойынша жұмысты жалғастыруда. Бұл — тікелей әуе қатынасын ашу үшін қажетті міндетті шарт. Қыркүйек айында америкалық сарапшылар қазақстандық авиациялық қадағалау жүйесіне бағалау жүргізіп, алдын ала брифинг қорытындысы бойынша атқарылған жұмыстар мен бірқатар бағыттағы оң нәтижелерді атап өтті. 1-санатты беру туралы түпкілікті шешімді FAA қабылдауы тиіс.
Сонымен қатар, жаңа бағыттарды іске қосу үшін Air Astana әуе компаниясы 2026–2027 жылдары үш Boeing 787 Dreamliner ұшағының жеткізілуін күтуде. Оларды, соның ішінде АҚШ-қа ұшатын рейстерде пайдалану жоспарланып отыр.










