«Қазақтелеком» АҚ 2026 жылдың қаңтар-қыркүйек айларын қаржылық көрсеткіштерінің күрт нашарлауымен аяқтады. Телекоммуникация операторының таза пайдасы бір жыл ішінде 136,4 млрд теңгеге азайып, 153,8 млрд теңгеден 17,4 млрд теңгеге дейін қысқарды.
Мұндай күрт құлдыраудың басты себептерінің бірі – өткен жылғы біржолғы ірі табыс. 2025 жылы компания Tele2 және Altel ұялы байланыс операторларын сатудан 106,4 млрд теңге көлемінде пайда алған болатын. Ал 2026 жылғы қаржылық есепте мұндай түсім жоқ.
Алайда компания пайдасының азаюын тек активтерді сатудан түскен біржолғы табыстың болмауымен түсіндіруге келмейді.
«Қазақтелекомның» негізгі қызметінен түсетін пайдасы да айтарлықтай төмендеген. Былтыр алғашқы тоғыз айда жалғасып жатқан қызметтен 47,3 млрд теңге пайда түссе, биыл бұл көрсеткіш 17,4 млрд теңгені ғана құрады. Яғни 63,2%-ға қысқарды.
Соған қарамастан, компанияның клиенттермен жасалған келісімшарттар бойынша кірісі өскен. Атап айтқанда, түсім 5,7%-ға артып, 436,2 млрд теңгеге жетті.
Бірақ шығындар кірістен әлдеқайда жылдам көбейген. Сатылған қызметтердің өзіндік құны 9,4%-ға өсіп, 350,5 млрд теңгені құрады.
Осының салдарынан «Қазақтелекомның» операциялық пайдасы 18,5%-ға төмендеп, 64 млрд теңгеге дейін азайды.
Осылайша, Tele2 мен Altel операторларын сатудан түскен біржолғы табысты есепке алмағанның өзінде, компанияның қаржылық жағдайы нашарлағаны байқалады.
Кіріс көлемінің артуы шығындардың өсуін өтей алмаған. Нәтижесінде Қазақстандағы ірі телекоммуникациялық компаниялардың бірі табысын арттырғанымен, таза пайдасының басым бөлігін жоғалтты.










