Polisia.kz мәліметінше, 41 және 49 жастағы күдіктілер 13 бас мал ұрлаудың кемінде тоғыз дерегіне қатысы болуы мүмкін. Тергеу деректері бойынша, ер адамдар жүйелі схемамен әрекет еткен: Ақсу және Ескелді аудандарының жайылымдарынан ірі қара мен жылқыларды ұрлап, малды сол жерде сойған. Кейін етті Талдықорғанға жеткізіп, гаражда бөлшектеп сатқан.
Кезекті ұрлықты аяғына дейін жеткізуге Ақсу ауданының жедел уәкілдері тосқауыл қойды — күдіктілер етті гаражға жеткізу сәтінде қолға түсті. Тәркіленген 600 келіге жуық жылқы еті заңды иелеріне қайтарылды.
Қазіргі уақытта екі күдікті де қамауға алынып, сотқа дейінгі тергеп-тексеру жүргізілуде. Полицейлер олардың 2025–2026 жылдары өңір аумағында жасалған осыған ұқсас басқа да қылмыстарға қатысы бар-жоғын тексеріп жатыр.










