Мемлекет басшысының айтуынша, цифрлық құрал несие беру туралы шешімдерді барынша объективті әрі ашық етеді. Сонымен қатар, Тоқаев ауыл шаруашылығына жасанды интеллектіні белсенді енгізуге шақырды. Ол жаһандық азық-түлік қауіпсіздігіне қатысты алаңдатарлық болжамдар аясында Қазақстанның әлемдік ауқымдағы азық-түлік базасына айналуға нақты мүмкіндігі бар екенін атап өтті.
Дегенмен Президент отандық агроөнеркәсіп кешенінің өнімділігі әзірге көңіл көншітпейтінін мойындады. Осы мәселені шешу үшін Үкіметке халықаралық қаржы институттарымен бірлесіп арнайы бағдарлама әзірлеу тапсырылды. Құжат ұзақмерзімді қаржыландыруды тартуды, техникалық және сараптамалық қолдау көрсетуді, сондай-ақ заманауи технологиялар мен ғылыми әзірлемелерді енгізуді қамтуы тиіс.










