Тізімге Үлкен және Кіші Алматы, Есентай, Ақсай, Қарағайлы, Ерменсай өзендері, Үлкен Алматы көлі, Алматы көлі және Сайран су қоймасы енді.
Жаңа ережеге сәйкес, су қорғау белдеуінің ені 35 метрді құрайды. Бұл аумақта ғимараттар мен құрылыстар салуға және пайдалануға, сондай-ақ бағбандық пен саяжай құрылысына жер учаскелерін бөлуге толығымен тыйым салынады.
Ал су қорғау аймақтарының ені нақты нысанға байланысты белгіленді:
-
өзендер мен каналдардың басым бөлігі үшін — 120 метр;
-
Сайран су қоймасы үшін — 150 метр;
-
Алматы көлі мен Терісбұлақ өзені үшін — 300 метр;
-
Үлкен Алматы көлі мен өзендердің жекелеген учаскелері үшін — 500 метрге дейін.
Су қорғау аймақтары шегінде нысандарды салу мен қайта жаңарту, жер қазу жұмыстары және құбырлар мен кабельдер тарту тек уәкілетті мемлекеттік органдармен келісілгеннен кейін ғана рұқсат етіледі. Сонымен қатар бұл аумақтарда жанармай құю станцияларын, көлік жуу орындарын, қоқыс полигондарын, мұнай өнімдері мен тыңайтқыш қоймаларын, мал шаруашылығы фермаларын, зираттар мен мал қорымдарын орналастыруға қатаң тыйым салынады.
Қолданыстағы ғимараттарға да жеке талаптар қойылады: 35 метрлік белдеуде су айдындарының ластануын болдырмайтын жүйелермен жабдықталмаған құрылыстарды пайдалануға болмайды. Дегенмен қаулы су жағасындағы барлық ғимаратты автоматты түрде сүруді көздемейді — әрбір нысанның заңдылығы жеке-жеке қаралатын болады.










