Ресей президентінің баспасөз хатшысы Дмитрий Песков журналист Павел Зарубинге берген сұхбатында Қазақстан Президенті Қасым-Жомарт Тоқаевты үлкен ресурстарға ие, саяси тұрғыдан мықты көшбасшы деп бағалады.
Бұған Тоқаевтың Владимир Путин туралы айтқан пікірі түрткі болды. Песковтың айтуынша, мұндай мәлімдемелерді болашақты болжай алатын саяси көрегендігі бар, табанды әрі бірізді тұлғалар ғана жасай алады.
«Президент Тоқаев — саяси тұрғыдан өте мықты, аса қуатты және зор ресурсқа ие адам. Болашақты бағдарлай алатын осындай саяси көрегендікке, табандылық пен тұрақтылыққа ие адамдар ғана мұндай пікір білдіре алады. Басқалардың бұған батылы бара бермейді», — деп атап өтті Дмитрий Песков.
Еске сала кетейік, бұған дейін Қасым-Жомарт Тоқаев Путинмен жақсы таныс екенін айтып, оның тарихы күрделі ірі мемлекетті басқару қабілетіне жоғары баға берген болатын.










