Президент Қасым-Жомарт Тоқаевқа Қазақстан мен Оңтүстік Корея арасындағы бірлескен инвестициялық жобалар таныстырылды. Бастамалар экономиканың бірнеше саласын қамтиды.
Жобалардың қатарында Алматыда автокомпоненттер өндірісін жергіліктендіру жоспары бар. Оның аясында отандық автозауыттарға арналған дыбыс бәсеңдеткіштер, орындық қаптамалары, сымдар шоғыры және еден жабындары, сондай-ақ автокөлік дөңгелектеріне арналған дискілер шығару көзделген.
Мемлекет басшысына Қостанайда KIA көліктеріне арналған автокомпоненттерді шығаратын локализация орталығын құру жобасы да таныстырылды. Мұнда есік панельдері, орталық консольдер, орындықтар, төбе және еден қаптамалары, бамперлер және басқа да бөлшектер өндіру жоспарланып отыр.
Сонымен қатар Президентке медициналық ультрадыбыстық диагностикалық жүйелерді шығару жобасы ұсынылды.
Алматыда кореялық басқару моделін және заманауи медициналық технологияларды қолданатын көпсалалы аурухана салу бастамасы да таныстырылды.
Бұдан бөлек, Қазақстанда дрондар өндірісін іске қосу жобасы қаралды.
Ұсынылған бастамалар Қазақстан мен Оңтүстік Корея арасындағы инвестициялық және технологиялық ынтымақтастықты кеңейтуге бағытталған.










