Қасым-Жомарт Тоқаев Қазақстанның сапалы білім беру жүйесін дәйекті түрде дамытып, дарынды оқушыларға жан-жақты қолдау көрсетіп жатқанын мәлімдеді, деп хабарлайды SHYNDYK.KZ.
Президент былтыр Бейжіңде өткен Жасанды интеллект бойынша халықаралық олимпиадада қазақстандық құрама үш алтын, бір күміс және үш қола медаль жеңіп алғанын еске салып, бұл нәтижені жастардың жоғары зияткерлік әлеуетінің нақты дәлелі деп атады. Мемлекет басшысы сондай-ақ талантты оқушыларды дайындауға қосқан үлесі үшін мұғалімдер мен тәлімгерлерге алғыс айтты.
Тоқаевтың сөзінше, білім әлемді өзгертуге қауқарлы, ал олимпиадада туындаған жаңа идеялар медицина, білім беру, экология және басқа да салаларда қолданыс табуы мүмкін. Сөз соңында Президент қатысушыларға табыс тілеп, іс-шараны жоғары деңгейде өткізгені үшін ұйымдастырушыларға ризашылығын білдірді.
