Қазақстандық боксшы Тыныш Әбілмансұр Threads әлеуметтік желісінде ерекше ұсыныс жариялады. Ол Геннадий Головкиннің GGG таңбасы бар алтын түстес бокс қолғаптарын автокөлікке айырбастағысы келетінін мәлімдеді.
«Менде Triple G-дің алтын қолғаптары бар. Оларды жақсы автокөлікке айырбастап көргім келеді», – деп жазды спортшы.
Әбілмансұрдың айтуынша, бокс ол үшін жай ғана спорт емес, өмірінің маңызды бөлігі. Сондықтан ол қолғаптарын айырбастауға ниетті адамдарды әлеуметтік желі арқылы іздеуді жөн көрген. Боксшы ұсынысына қызығушылық танытқан коллекционерлер мен кәсіпкерлерді байланысқа шығуға шақырды.
Айта кетейік, 2021 жылы Геннадий Головкиннің алтын қолғаптары қайырымдылық аукционында 50 млн теңгеге сатылған болатын.
Әбілмансұр жариялаған суреттегі қолғаптар сол бұйымға сырттай ұқсайды. Алайда олардың аукционда сатылған қолғаптармен бірдей екені немесе Головкиннің жеке заттарының бірі екені расталған жоқ. Сондықтан спортшы ұсынған қолғаптардың нақты құны әзірге белгісіз.
