Қазақстанда Президент Қасым-Жомарт Тоқаевтың таңдаулы нақыл сөздері енген «Әділетті қоғамға шыншыл сөз» кітабы жарық көрді. Бұл туралы өзінің әлеуметтік желідегі парақшасында Президенттің ішкі саясат және коммуникациялар мәселелері жөніндегі көмекшісі Арман Қырықбаев мәлімдеді, деп хабарлайды SHYNDYK.KZ.
Кітапта Мемлекет басшысының 30 жылдан астам уақыт ішіндегі – 1990 жылдардың мұрағат материалдарынан бастап соңғы жария үндеулеріне дейінгі негізгі сөздері мен тұжырымдары жинақталған. Басылымға Қазақстанда да, сондай-ақ халықаралық мінберлерде де айтылған тезистер енгізілді.
Материалдар 21 тақырыптық бөлімге бөлінген. Олардың қатарында заң үстемдігі, мемлекеттік басқару, қоғамдық қауіпсіздік, білім беру, цифрландыру, ұлттық бірегейлік, экологиялық мәдениет және «Таза Қазақстан» бастамасы бар.
Атап өтілгендей, басылым Президенттің мемлекет құрылысы мен қоғам дамуы мәселелеріне қатысты көзқарастарының эволюциясын бақылауға мүмкіндік береді. Таяу уақытта кітапты қоғамдық кітапханаларға, жоғары оқу орындарына, колледждерге, саяси партиялар мен жастар ресурстық орталықтарына табыстау жоспарланып отыр.
