Таяу күндері Қазақстанда ауа райы қайтадан күрт өзгереді. 8-10 тамыз аралығында көптеген өңірде құрғақ әрі өте ыстық болады.
Еліміздің басым бөлігін антициклон басып, оңтүстіктен келетін жылы ауа массаларының ықпалымен күн күрт ыси бастайды.
Қазақстанның солтүстігі мен шығысында күндіз термометр бағамы +35…+39 градусқа дейін көтеріледі деп күтілуде. Ал батыс және орталық аймақтарда одан да ыстық болады — кей жерлерде +36…+41 градусқа дейін жетеді.
Еліміздің оңтүстігінде де синоптиктер қатты ыстық болатынын болжап отыр. Жекелеген аудандарда ауа +40…+41 градусқа дейін қызады.
Дегенмен, жауын-шашынсыз да болмайды. Батыс пен солтүстік-батыста осы кезеңнің соңына қарай қайтадан найзағай ойнап, бұлт үйіріледі. Кей жерлерде жаңбыр жауып, бұршақ түсуі және қатты жел тұруы ықтимал.
Ал шығыста жауын-шашын ертерек басталады. Сондай-ақ еліміздің оңтүстігі мен оңтүстік-шығысындағы таулы аймақтарда да жаңбыр мен найзағай сақталады.
Әсіресе Ақтөбе облысының кейбір аудандарында ауа температурасы +40…+41 градусқа дейін көтеріліп, өте ыстық болады.
Алдын ала болжамға сүйенсек, тамыз айында қазақстандықтарды ауа райының құбылмалылығы әлі де таңғалдырады: аптап ыстық жаңбырмен, найзағаймен және қысқа мерзімді салқынмен алмасып отырады. Жекелеген күндері кейбір өңірлерде температура бұдан да жоғары көтерілуі мүмкін.
Бұл туралы «Қазгидромет» РМК-ға сілтеме жасап SHYNDYK.KZ хабарлайды. Ең өзекті және маңызды жаңалықтарды біздің сайттан оқи аласыздар.
