Алматыдағы Абай даңғылының бойында ағашқа аяғынан ілінген, қара қапқа оралған адам денесіне ұқсас зат тұрғындардың үрейін ұшырды. Оқиғаның видеосы Threads әлеуметтік желісінде тарады.
Белгілі болғандай, қорқынышты безендіру Vincent мейрамханасының маңында орналасқан. Жазба авторы мейрамхананың парақшасын белгілеп, мұның жарнама екенін сұраған.
Желі қолданушылары бұл Хэллоуин мерекесіне арналған декорация болуы мүмкін деп болжады. Алайда мұндай идея көпшілікке ұнай қоймады.
Видео авторы көрген сәтте қатты қорыққанын айтса, пікір қалдырған тұрғындар мұндай безендірудің қоғамдық орында орналасуын сынға алды.
Әзірге мейрамхана әкімшілігінің бұл жағдайға қатысты ресми түсініктемесі жарияланған жоқ.
