Павлодар қаласының 27 жастағы тұрғыны, толық жетім Марина Харчук Мемлекет басшысы Қасым-Жомарт Тоқаевқа бейнеүндеу жолдады. Келіншек өзінің және жолдасының адал еңбек етіп, жалақы алғаны үшін ғана заңды баспанасынан қағылғанын айтып, осы бір ақылға қонымсыз жағдайға араласуды сұрайды, деп хабарлайды SHYNDYK.KZ.
Марина әлеуметтік тұрғын үй кезегіне бала кезінде, 2008 жылы тұрған. 18 жыл бойы сарыла күткен кезегі биыл 6 тамызда жетіп, 1414 қызметінен аумағы 81 шаршы метр болатын екі бөлмелі пәтер бөлінгені туралы хабарлама келген. Қуанышы қойнына сыймаған отбасы бірден келісім беріп, инвентаризациядан да сәтті өтеді. Алайда көп ұзамай оларға тұрғын үй беруден бас тартылған. Оған отбасы табысының белгіленген шектен асып кетуі себеп болыпты.
Белгілі болғандай, Марина «Қамқор Вагон» компаниясында 6 жылдан бері тұрақты жұмыс істейді, айлығы шамамен 300 мың теңге. Жолдасының да табысы осындай. Екеуінің қосқандағы жалпы кірісі – 600 мың теңге.
Келіншектің айтуынша, бұл ақша тек ең қажетті дүниелерге ғана жетеді: жас отбасы пәтер жалдап тұрады, қыздарының балабақшасына, азық-түлікке, коммуналдық қызметтер мен несиелеріне төлейді.
«Мен 18 жыл бойы тұрғын үй кезегінде тұрған толық жетім болсам да, неге адал еңбек етіп, табыс тауып жүргенім үшін баспанадан айрылуым керек? Осыны түсінбеймін. Мен жұмыс істеп, өз отбасымды өзім қамтамасыз еткім келеді. Бірақ пәтер алу үшін табысым аз болуы керек деген талапты мүлдем ұға алар емеспін. Егер аз жалақы алсам, отбасымды қалай асыраймын?» — деп күйінеді қазақстандық.
Жауапты мекемелерден нақты әрі тұщымды жауап ала алмаған Марина Президенттен осы әділетсіздікке назар аударып, мәселені қайта қарауға және 18 жыл күткен пәтерін қайтарып алуға көмектесуін сұрайды.
