FlyArystan Ақтау мен Дубай арасындағы әуе қатынасын тоқтату мерзімін тағы да ұзартты. Ақтау – Дубай – Ақтау бағытындағы рейстер 2026 жылдың 15 қыркүйегіне дейін (сол күнді қоса алғанда) орындалмайды. Бұл шешім Таяу Шығыстағы тұрақсыз жағдайдың сақталуына байланысты қабылданып отыр.
Тоқтатылған рейстерге билет сатып алып қойған жолаушыларға екі түрлі нұсқа ұсынылады. Біріншісі – ешқандай айыппұлсыз билет құнын толықтай қайтарып алу. Екіншісі – ұшу күнін бір рет тегін өзгерту. Сапарды бастапқы ұшу күнінен бастап 30 күн ішінде, бос орындар болған жағдайда ғана ауыстыруға рұқсат етіледі.
Ақтау мен Дубай арасындағы рейстер осымен бірінші рет тоқтатылып тұрған жоқ. Аймақтағы күрделі жағдай мен әуе кеңістігін пайдалануға қатысты шектеулерге байланысты ұшуды қайта бастау мерзімі бұған дейін де бірнеше рет кейінге шегерілген болатын.
Демек, жолаушыларға 15 қыркүйектен кейін әуе қатынасы бірден қалпына келеді деп үміттенудің қажеті жоқ. Бұл – әзірге белгіленген уақытша мерзім ғана. Авиакомпания алдағы уақытта рейстерді қайта жандандыру мәселесін аймақтағы жағдай мен ұшу қауіпсіздігіне қарап шешетін болады.
Сондықтан таяу апталарға билет алып қойған азаматтарға өз рейсінің мәртебесін алдын ала тексеріп, ақшаны қайтару немесе ұшу күнін өзгертудің қайсысы тиімді екенін ертерек шешіп алған жөн.
Бұл туралы SHYNDYK.KZ хабарлайды. Ең өзекті және маңызды жаңалықтарды біздің сайттан оқи аласыздар.
