Маңғыстау облыстық балалар ауруханасының директоры 13 жасар жасөспірімнің қайтыс болуына байланысты жүргізілген тексерістен кейін атқарып отырған лауазымынан босатылды. Тексеріс қорытындысы бойынша өрескел заңбұзушылықтар анықталып, қылмыстық іс қозғалды.
SHYNDYK.KZ редакциясының мәліметінше, қайғылы оқиға сәуір айында орын алған. Баланың анасының айтуынша, ол алғаш рет биыл 17 қаңтарда аппендицит күдігімен дәрігерлерге көмек сұрап келген. Дәрігерлер бақылағаннан кейін оны үйіне жіберген. Алайда жағдайы нашарлап, мамандарға бірнеше рет қайта қаралғанымен, дұрыс диагноз қойылмаған.
Бұл жағдай Қазақстанның Денсаулық сақтау министрі Ақмарал Әлназарованың жеке бақылауында тұр. Министр кінәлілердің әділ жазаға тартылуы тиіс екенін мәлімдеп, Астана қаласында қаза тапқан баланың анасымен жеке кездесу жоспарлап отырғанын жеткізді.
