Қыркүйек айында Ресейде IX шақырылымдағы Мемлекеттік дума депутаттарын сайлау науқаны өтеді. Бұл туралы ел Президенті Владимир Путин қол қойған жарлықта айтылған.
SHYNDYK.KZ редакциясының хабарлауынша, Орталық сайлау комиссиясының шешімімен дауыс беру науқаны үш күнге созылып, 18, 19 және 20 қыркүйекте өтеді. Барлығы 450 депутаттық мандат сарапқа салынады. Сайлау аралас жүйе бойынша ұйымдастырылады: 225 парламент мүшесі партиялық тізім арқылы сайланса, тағы 225-і бір мандатты округтерден таңдалады.
Сайлауды өткізу үшін жаңа субъектілерді ескере отырып, бір мандатты округтердің жаңа схемасы бекітілді. Атап айтқанда, ДХР-да үш, ЛХР-да екі, ал Запорожье және Херсон облыстарының әрқайсысында бір-бірден округ құрылды.
Қазіргі уақытта Ресейде 20 саяси партия тіркелген. Олардың 11-і қол жинамай-ақ сайлауға қатысу құқығына ие болды. Бұлардың қатарында «Единая Россия», КПРФ, «Справедливая Россия — За правду», ЛДПР, «Новые люди», Ресей зейнеткерлер партиясы, «Коммунисты России», «Яблоко», «Зелёные», «Родина» және «Партия прямой демократии» бар.
Бұдан бөлек, тағы алты партия сайлауға қатысу үшін кемінде 200 мың қол жинауға тиіс болғанымен, ОСК-ға құжаттарын тапсырмады.
