Әлеуметтік желілерде шымкенттіктердің Мемлекет басшысына жолдаған ашық хаты жарияланды. Қала тұрғындары кешқұрым және түн мезгілінде қаланы шіріген жұмыртқаның (күкіртсутек) иісі басып қалатынын айтып дабыл қағуда. Тұрғындардың сөзінше, қолқаны қабатын сасық иістен қорғану үшін халық терезелерін тарс жауып отыруға мәжбүр.
Жұртшылық ауаны ластаушы негізгі көздер ретінде жергілікті ірі өндіріс ошақтарын — мұнай өңдеу және цемент зауыттарын, сондай-ақ бұрынғы қорғасын зауытының аумағындағы кәсіпорындарды атайды. Олар түнде дәл осы өнеркәсіп аймақтарынан қалың түтін мен химиялық иіс шығатынын алға тартуда. Дегенмен, әкімдік пен экология департаментіне талай жылдан бері жасалған шағымдардан еш нәтиже жоқ. Тұрғындар жергілікті бақылаушы органдар тек құрғақ жауаппен құтылып жүр деп есептейді.
Өз үндеуінде шымкенттіктер президенттен Экология министрлігіне аталған зауыттарды түн ішінде, басшылыққа ескертпестен кенеттен тексеруді тапсыруды сұрады. Сонымен қатар, олар заңбұзушылықтарды анықтау үшін тәуелсіз сарапшылар мен дрондарды тартуды, ауа сапасын тәулік бойы бақылайтын ашық жүйе орнатуды және халықтың шағымын елеусіз қалдырған шенеуніктерді жауапқа тартуды талап етіп отыр.
Бұл мәселеге қатысты түсініктеме алу үшін редакция Шымкент қаласының әкімдігіне ресми сауал жолдады.
