Астана қаласының бағыттық автобустарының бірінде қайғылы жағдаймен аяқтала жаздаған оқиға болды. Жол жүріп бара жатқан бала кәмпитке шашалып, кенеттен тұншыға бастаған. Айналасындағы жолаушылар жағдайдың өте қауіпті екенін бірден түсінген.
SHYNDYK.KZ хабарлағандай, осы сәтте автобус ішінде болған полиция қызметкері еш ойланбастан көмекке ұмтылған. Ол жағдайды тез бағамдап, баланың тыныс алу жолдарын босату үшін шұғыл әрекетке көшкен.
Мұндай жағдайда мүдіруге мүлдем болмайтын еді, себебі адамның жағдайы санаулы минуттар ішінде күрт нашарлап кетуі мүмкін. Тәртіп сақшысының сауатты әрі жылдам іс-әрекетінің арқасында кәмпит баланың тамағынан түсіп, ол қайтадан өздігінен тыныс ала бастады.
Құтқару сәті бейнебақылау камерасына түсіп қалған. Кадрлардан полиция қызметкерінің балаға қалай алғашқы көмек көрсетіп жатқанын анық көруге болады. Қазіргі уақытта баланың жағдайы жақсы, дер кезінде жасалған әрекеттің арқасында айтарлықтай қауіптің беті қайтты.
