Сирияның бұрынғы көшбасшысы Башар Асад өз елінде сырттай өлім жазасына кесілді. Ол адамзатқа қарсы және әскери қылмыстар жасады деп айыпталған.
SHYNDYK.KZ хабарлағандай, дәл осындай қатаң үкім оның туған інісі Махер Асадқа және немере ағасы Атеф Наджибке де шығарылды.
Башар мен Махер Асад сот отырысына қатысқан жоқ. Олар 2024 жылдың желтоқсан айында биліктен құлағаннан кейін Сириядан кетіп, қазіргі уақытта Ресейде бас сауғалап жүр.
Ал Атеф Наджиб сот залында болып, үкімді өз құлағымен естіді. Ол бұрын Сирия армиясының бригада генералы қызметін атқарған және Дараа провинциясындағы Саяси қауіпсіздік басқармасын басқарған.
Сот оның қылмыстық жауапкершілігін 2011 жылы Дараадағы үкіметке қарсы бейбіт шерулерді қатыгездікпен басып-жаншу әрекетімен тікелей байланыстырды. Дәл осы провинциядағы наразылықтар кейіннен көпжылдық қанды азаматтық соғысқа ұласқан Сирия көтерілісінің алғашқы ірі оқиғаларының бірі болған еді.
Еске сала кетейік, Башар Асадтың билігі 2024 жылдың желтоқсан айында қарулы оппозицияның шабуылы мен Дамаскіні басып алуынан кейін толық құлаған болатын. Бұрынғы президент алдымен елорданы тастап шығып, кейін ресейлік Хмеймим авиабазасына барған.
Кейінірек Асад үкімет күштерінің жағдайы мүшкіл болып, Хмеймим базасы ұшқышсыз ұшақтардың шабуылына ұшырағаннан кейін ғана Сириядан кетуге мәжбүр болғанын мәлімдеді. Осы оқиғалардан соң ол Ресейге эвакуацияланған.
