Өз анасына пышақпен шабуыл жасады деген күдікке ілінген азамат Вьетнамнан Қазақстанға жеткізілді. Тергеу мәліметтеріне сүйенсек, жаға ұстатарлық қылмыс 2025 жылдың қараша айында болған.
SHYNDYK.KZ хабарлағандай, оқиға күні ер адам үйінде мас күйде болған және сол сәтте анасы екеуінің арасында үлкен жанжал шыққан. Ұрыс барысында ол туған анасына бірнеше рет пышақ сілтеген деп болжанып отыр.
Қанды оқиғадан кейін күдікті бірден бой тасалап, оған халықаралық іздеу жарияланған еді. Биылғы жылдың маусым айында қашқын Вьетнам аумағынан табылып, барлық заңды рәсімдер аяқталған соң Қазақстанға экстрадицияланды.
Қазіргі уақытта күдікті тергеу изоляторына қамалып, тиісті тергеу амалдары жалғасып жатыр. Егер оның кінәсі сотта толық дәлелденсе, ол үш жылдан сегіз жылға дейінгі мерзімге бас бостандығынан айырылуы мүмкін.
