Тамыз айының алғашқы онкүндігінде ҰҚК Шекара қызметінің мамандары мемлекеттік шекара арқылы тауарлар мен жүктерді заңсыз алып өтудің 551 дерегінің жолын кесті. Тәркіленген контрабандалық заттардың жалпы құны бір миллиард теңгеден асып түскен.
Осы орайда SHYNDYK.KZ редакциясы заңсыз тасымалдың басым бөлігі жанар-жағармай өнімдерін ел аумағынан жасырын алып шығу әрекеттерімен байланысты екеніне назар аударады. Нақтырақ айтсақ, шекарашылар осындай 411 фактіні тіркеген.
Сонымен қатар, қалған 140 жағдайда құқық бұзушылар халық тұтынатын түрлі тауарларды бекітілген тәртіпті өрескел бұза отырып өткізбек болған. Қазіргі таңда кінәлі тұлғалар Қазақстан заңнамасына сәйкес тиісті жауапкершілікке тартылды. Өз кезегінде Ұлттық қауіпсіздік комитеті шекара бекеттеріндегі мұндай құқық бұзушылықтарды анықтау және жолын кесу жұмыстары бір сәтке де тоқтамайтынын ескертеді.
