Бүгін Астанадағы «Жастар» сарайында Қазақстан Халық партиясының «Әлеуметтік Қазақстан» атты бірінші конгресі өтуде. Шара барысында партия төрағасы Нұрсұлтан Шоқанов сөз сөйледі.
Шоқанов өз сөзінде азаматтардың басым бөлігінің әл-ауқатын арттырып, тең мүмкіндіктерге жол ашатын негізгі бағыт – социализм екенін мәлімдеді.
«Социализм туралы мен айтпағанда, кім айтады? Басқа партия көшбасшыларының қайсысы еңбек адамын дәл мендей біледі?» — деді ҚХП төрағасы.
Ол жаңа Конституция қабылданғаннан кейін саяси партиялар үшін жаңа мүмкіндіктерге жол ашылғанын атап өтті.
«Бұл — бұрын-соңды болмаған мүмкіндік. Ол барлық партияларға жол ашады және олардың әрқайсысы өзінің бағыт-бағдарын ұсынып отыр», — деп мәлімдеді Шоқанов.
Оның сөзінше, саяси күштердің басым бөлігі капиталистік модельді және ірі бизнесті қолдайды, алайда бұл тәсіл қарапайым халықтың жағдайын жақсартуға кепілдік бермейді.
«Бұл жағдай 35 жыл бойы жалғасып келеді. Енді бәрі басқаша болады дегенге бізді не сендіре алады?» — деп сауал тастады ҚХП басшысы.
Шоқанов бүгінгі таңдағы басты қоғамдық сұраныс — әділеттілік екенін, ал ол азаматтардың өмір сүру сапасының нақты артуынан көрініс табуы тиіс екенін жеткізді.
«Социализм — баршаға ортақ тең мүмкіндіктер мен әл-ауқаттың артуына апаратын жалғыз жол екеніне сенімдімін», — деп баса айтты ол.
Партия төрағасы әлеуметтік теңсіздік мәселесіне де жеке тоқталды. Ол Мемлекет басшысының ел байлығының санаулы ғана бай-бағландардың қолында шоғырлануына қатысты айтқан бағасын еске салды.
«Ойланып көріңіздерші: 162 адам және 20 миллион азаматымыз бар. Мұның несі әділеттілік? Бұл жағдай осылай жалғаса беруі мүмкін емес», — деді Шоқанов.
Дегенмен, ол Тәуелсіздіктің 35 жылы ішінде Қазақстанның белгілі бір экономикалық өсімге қол жеткізгенін, кәсіпорындар мен жұмыс орындарын сақтап қалғанын мойындады. Алайда, оның айтуынша, осы уақыт аралығында Қазақстан әділетті қоғамға жақындай алды ма және тең мүмкіндіктер еліне айналды ма деген сұрақ әлі де ашық күйінде қалып отыр.
Өз сөзінде Шоқанов Абай Құнанбайұлының мұрасы тақырыбына да бұрылды.
«Абай мен Құнанбай төңірегіндегі әңгімелер мен пікірталастар барысында біз бір нәрсені назардан тыс қалдырып жатқанымызды байқамаймыз. Оның анасы ше? Әжесі ше?» — деді ол.
ҚХП төрағасы болашақ ұлы ақынды тәрбиелеуде және оның гуманистік дүниетанымын қалыптастыруда Ұлжан мен Зеренің рөлі зор екенін атап өтті. Сонымен қатар, ол бүгінде қазақстандықтар Құнанбайдың материалдық жағдайы қандай болғанын білмеуі мүмкін екенін, бірақ Абайдың қандай мұра қалдырғанын өте жақсы білетінін баса айтты.
«Талай ұрпақ алмасты. Жаңа айтқанымдай, біз Құнанбайдың қанша байлығы болғанын білмейміз, бірақ Абайдың бізге не қалдырғанын білеміз және оны құрмет тұтамыз», — деді партия басшысы.
Сөзін қорытындылай келе, Шоқанов тең мүмкіндіктер идеясын капиталистік модельді одан әрі сақтап қалуға тағы да қарсы қойып, жақтастарын партия төңірегіне топтасуға шақырды.
«Бүгін біздің алдымызда үлкен таңдау тұр: басым көпшілікке арналған тең мүмкіндіктер мен әл-ауқат па, әлде тағы да 35 жылдық капитализм бе? Адамның қоғамдағы орны оның әмиянының қалыңдығымен өлшенбеуі тиіс! Қазақстан Халық партиясының төңірегіне топтасып, өзіміз үшін тең мүмкіндіктер мен әл-ауқатты қалыптастырайық және бүкіл Қазақстанды соңымыздан ертейік!» — деп түйіндеді Шоқанов.
