АҚШ Президенті Дональд Трамп ұшқышсыз ұшу аппараттары мен олардың бөлшектерінің импортына жаңа тарифтер енгізу туралы құжатқа қол қойды. Мұндағы ең жоғары мөлшерлеме 100 пайызды құрайды.
Ең жоғары баж салығы ұлттық қауіпсіздік тұрғысынан ерекше маңызды деп танылған дрондарға қолданылады. Бұл санаққа ең жоғары ұшу салмағы 25 келіден асатын аппараттар, сондай-ақ жылу бейнелеуіштермен жабдықталған ұшқышсыз ұшу аппараттары кірді. Сондай-ақ кейбір маңызды құрамдас бөліктер мен қондырғы станциялар үшін де 100 пайыздық тариф қарастырылған.
Жеңілдеу дрондар мен бірқатар жиынтық бөлшектер үшін 25 пайыздық мөлшерлеме бекітілді.
Бұл ретте Вашингтон өз серіктестерінің бірқатары үшін жеке жағдайларды қарастырды. Еуропалық одақ, Жапония, Оңтүстік Корея, Швейцария, Тайвань және Лихтенштейннен әкелінетін дрондар мен бөлшектер технологиялардың, бағдарламалық және аппараттық қамтамасыз етілудің шығу тегіне қойылатын талаптар сақталған жағдайда 15 пайыздық баж салығымен салық салынады. Ал Ұлыбритания өнімдері үшін мөлшерлеме 10 пайызды құрайды.
АҚШ бұл қадамға неліктен барды?
Американдық әкімшілік бұл шешімді ең алдымен дрондардың қазіргі заманғы қарулы қақтығыстардағы рөлінің артуымен байланыстырады.
Вашингтонда елдің дайын дрондарды да, жекелеген бөлшектерді де шетелдік өндірушілерге тәуелді болуын қауіпті деп санайды. Ұшқышсыз жүйелердің өндірісі тікелей тәуелді болатын аса маңызды электронды компоненттер мен технологияларға ерекше назар аударылады.
Тағы бір маңызды аргумент – киберқауіпсіздік. Дрондарда шетелдік технологияларды пайдалануды АҚШ билігі ықтимал осалдық ретінде қарастырады.
Сонымен қатар, жаңа тарифтер компанияларды өндірісті тікелей АҚШ аумағына көшіруге итермелеуі тиіс. Сауда министрлігіне американдық дрон өндірісі мен жиынтық бөлшектерге инвестиция салуға дайын кәсіпорындарды қолдау тетігін әзірлеу тапсырылды.
Жаңа тарифтер қашан күшіне енеді?
Жоғарылатылған баж салығының негізгі бөлігі құжатқа қол қойылғаннан кейін 21 күн өткен соң күшіне енеді.
Ұлттық қауіпсіздік үшін аса маңызды деп саналмайтын кейбір жиынтық бөлшектер үшін 180 күндік ұзақ өтпелі кезең қарастырылған.
Осылайша, Вашингтон бір мезгілде екі міндетті шешуге тырысып жатыр: шетелдік жеткізушілерге тәуелділікті азайту және өз өндірістік базасын құруды жеделдету.
Бұл шешім Трамп әкімшілігінің американдық экономиканың стратегиялық салаларын қорғау үшін импорттық баж салықтарын пайдалану бағытын жалғастыра түседі. Бұл жолы азаматтық сала мен қорғаныс секторында маңызы күрт артқан ұшқышсыз жүйелер индустриясы назар орталығында болды.
