Қайғылы оқиға 6 шілдеде Целиноград ауданындағы ат спорты клубтарының бірінде болған. Атпен серуендеу кезінде келіншек аттан құлап, ауыр жарақат алған. Ол ауруханаға өте ауыр жағдайда жеткізіліп, комаға түскен.
Дәрігерлер науқастың өмірі үшін бір айға жуық уақыт күресті. Алайда 13 тамызда ол көз жұмды.
Ақмола облыстық полиция департаменті SHYNDYK.KZ-ке хабарлағандай, тергеу оқиғадан кейін бірден басталған.
«Астана қаласы тұрғынының аттан құлауына байланысты 6 шілдеде қауіпсіздік талаптарына сай келмейтін қызмет көрсету фактісі бойынша қылмыстық іс қозғалды. Оқиға Целиноград ауданының аумағында орналасқан ат спорты клубтарының бірінде болған», — деп хабарлады полиция өкілдері.
Жәбірленуші қайтыс болғандықтан, болған оқиғаның құқықтық сипаты өзгереді.
«13 тамызда жәбірленуші алған жарақаттарынан қайтыс болды, осыған байланысты қылмыстық іс қайта сараланады. Тергеу жалғасып жатыр, қажетті тергеу әрекеттері жүргізілуде», — деп нақтылады ПД.
Енді тергеушілер қайғылы оқиғаның барлық мән-жайын, соның ішінде атпен серуендеудің қалай ұйымдастырылғанын және қауіпсіздік талаптарының сақталған-сақталмағанын анықтауы тиіс.
Марқұмның жақындарының айтуынша, Жазираның атқа міну тәжірибесі болған, ол бірінші рет атқа мініп тұрған жоқ. Ол қайтыс болғаннан кейін туыстары әлеуметтік желі арқылы қазақстандықтарға үндеу жасады. Олар адамдарды қауіпсіздікке барынша байыппен қарауға және әдемі суреттер мен видеолар үшін өздерін орынсыз қауіп-қатерге тікпеуге шақырды.
Бұған дейін елорда маңында атпен серуендеу кезінде тағы бір ауыр жағдай болған еді. Мамыр айында 20 жастағы жігіт аттан құлап түскен. Ол омыртқасынан ауыр жарақат алып, бірнеше ота жасатты және сал болып қалды.
Тергеу жалғасуда. Оқиғаның себептері мен кінәлілердің жауапкершілігі туралы түпкілікті қорытынды тергеу нәтижелері бойынша жасалады.
