Америкалық рэпер Канье Уэст (Ye) 15 тамызда Алматыдағы Орталық стадионда өнер көрсетті – бұл концерт ауа райының қолайсыздығы мен жарықтың өшуіне байланысты амалсыз шегерілгеннен кейін келесі күні өткен шара. Екі сағаттық шоу әртістің Қазақстандағы алғашқы толыққанды ашық концерті болды. Дегенмен кеш аяқталған соң желіде тек оң пікірлер ғана емес, көрермендердің көптеген шағымдары да қаптады, деп хабарлайды SHYNDYK.KZ.
Сахнаның басты элементі Жер шары бейнесіндегі үлкен сфера болды. Ye шардың төбесінде King трекімен пайда болып, концерттің басталуы отшашумен жалғасты. Алайда мұндай ерекше қойылым әзіл-шыны аралас конспирологияның туындауына түрткі болды: әртістің тым алыс тұрғанына байланысты кейбір желі қолданушылары сфераның үстіндегі шынымен де Канье ме, әлде көрермендерге оның «сыңарын», цифрлық көшірмесін немесе алдын ала дайындалған бейнені көрсетті ме деген сұрақ қоя бастады. Бірақ бұл болжамдарды растайтын ешқандай дәлел жоқ.
Ал билет иелерінің шағымдары әлдеқайда салмақтырақ болып шықты. Бірнеше көрермен концертке шамамен 40 минут кешігіп келгені үшін стадионға кіре алмағанын мәлімдеді. Келушілердің бірінің айтуынша, билеттердің жарамдылығы жойылмаған, бірақ сол жерде оларға ешкім тұшымды жауап бере алмаған. Өзге қолданушылар полиция шақыртқанын және бірігіп, ұжымдық шағым түсіруге ниетті екендерін жеткізді. VIP-аймақтың сапасы мен бағасы да наразылық тудырды: желіде шоудың ұйымдастырылуын басқа ірі концерттермен салыстырып, жүз мыңдаған теңге тұратын орындардың жабдықталуын сынға алды.
Тікелей Ye-ге қатысты да реніштер айтылды. Көрермендердің бір бөлігі әртістің концерттің шегерілгені үшін кешірім сұрамағанына, халықпен мүлде дерлік байланыс орнатпағанына, залмен амандаспай, қоштаспай кетіп қалғанына наразы болды. Осының аясында қолданушылар Майкл Джексонның жаңбыр астында өнер көрсеткен кездерін еске алды. Сонымен қатар, стадион маңындағы көпқабатты үйдің балконынан Алматының белгісіз тұрғыны жүргізген концерт трансляциясы да кеңінен таралды.
14 тамыздағы оқиғаларға қатысты да бөлек дау туындады. Концерттің шегерілуіне байланысты көрермендерді эвакуациялау кезінде ақпараттық экрандардағы хабарлама орыс, ағылшын және түрік тілдерінде жазылып, қазақ тілінде мүлде берілмеген. Желі қолданушылары мемлекеттік тілде визуалды ақпаратты орналастыруды реттейтін «Тіл туралы» заңның 21-бабын алға тартты. Ұйымдастырушы Дана Қарағұсова бұл жағдайды адамдарды стадионнан мейлінше тез әрі қауіпсіз шығару қажеттілігімен түсіндіргенімен, оның бұл уәжі сынның жаңа толқынын тудырды: пікір қалдырушылар асығыс кездің өзінде таблода түрік тіліне орын табылғанын атап өтті.
Талқылау барысында концертті ұйымдастырушы First Media Group компаниясы мен оның басшылығына да сын айтылып, желі қолданушылары бұрынғы сенатор, еңбек министрі, Мәжіліс депутаты әрі Дана Қарағұсованың анасы Гүлжан Қарағұсованы да еске алды. Интернетте экс-депутаттың мемлекеттік тілді «мәз емес» деңгейде меңгергенін көрсететін ескі видеолары қайта тарады.
Осылайша, көптен күткен Ye-дің Алматыдағы концерті өткенімен, оның ұйымдастырылуы мен кейінге шегерілу салдарын жұрт америкалық рэпердің өнерінен кем талқылап жатқан жоқ.
