Жамбыл облысындағы «Батыс Еуропа – Батыс Қытай» тасжолында Toyota RAV4 көлігі 36 жастағы ер адамды қағып кетті. Алдын ала мәлімет бойынша, көлік тізгінінде Мәжілістің бұрынғы депутаты Бақытжан Базарбек болған. Бұл туралы өзінің Telegram-арнасында HALYQSTAN басылымы хабарлады, деп жазады SHYNDYK.KZ.
Журналистің мәліметінше, бұл оқиғаға дейін тасжолда тағы бір жол апаты болған: бір көлік сиырды қағып кеткен. Бірнеше ер адам жануардың өлексесін жүрдек жолдан алып тастау үшін тасжолға шыққан. Дәл осы сәтте олардың бірі RAV4 көлігінің астына түсіп қалған.
Зардап шеккен адам аудандық ауруханаға жеткізілді. HALYQSTAN-ның хабарлауынша, ер адамның жабық бассүйек-ми жарақатын алғаны, миы соғылғаны, жабық пневмоторакс, сондай-ақ білек пен сирақ сүйектерінің сынғаны анықталған. Ауруханаға түскен кезде ол бірінші дәрежелі жарақаттық шок жағдайында болған. Дәрігерлер науқастың жағдайын ауыр деп бағалап отыр.
Материал жарияланған уақытта полиция оқиғаның мән-жайына қатысты ресми түсініктеме берген жоқ. Көлікті Бақытжан Базарбектің басқарғаны туралы ақпаратты құқық қорғау органдары да әзірге растаған жоқ.
