Белгілі продюсер Баян Алакөзова дәл осы алаңда өткен «KeshYOU» тобының мерейтойлық концертін еске алды. Оның айтуынша, сол кезде ұйымдастырушы топ салют атуға бірнеше рет рұқсат сұрағанымен, үзілді-кесілді тыйым салынған.
«Біздікілерге келгенде әлі күнге дейін: “кешіріңіз, сіздер өз адамдарымызсыздар, сіздерге болмайды”, ал Каньеге келгенде рұқсат етілетіні таңғаларлық әрі өкінішті… Сонда заң алдында бәрі тең, бірақ кейбіреулер одан да “теңірек” болғаны ма?» – деп жазды Алакөзова.
Сонымен қатар продюсер тек отшашу мәселесімен шектелмей, қос өнер иесінің сахналық қойылымын да салыстырып өтті.
«Біздің шынымен де әлемдік деңгейдегі шоу жасағанымызды, ал Каньенің сфераның үстінде жай ғана ары-бері жүріп, аса бас қатырмағанын ескерсек», – деді ол.
Продюсердің дәл осы сөздері желі қолданушыларының арасында қызу пікірталас тудырды. Оқырмандардың бір бөлігі америкалық рэпердің әлемдік деңгейдегі танымалдығы мен қойылым концепцияларының мүлде бөлек екенін алға тартып, KeshYOU тобын Канье Уэстпен салыстыруды орынсыз деп санады.
Ал өзге қолданушылар, керісінше, Алакөзованың сөзін қолдады. Олардың пікірінше, басты мәселе әртістердің атақ-даңқын салыстыруда емес, бір ғана сахнада өткен шараларға неліктен екі түрлі талап қойылғанында болып отыр.
Дегенмен «KeshYOU» тобының концертінде отшашуға нақты қандай себеппен рұқсат берілмегені және Канье Уэстің шоуы үшін пиротехника қандай талаптармен келісілгені әзірге белгісіз. Сондықтан шетелдік әртіске ресми түрде артықшылық берілді деп кесіп айтуға болмайды. Бұл ретте әңгіме Баян Алакөзованың ашық көтерген мәселесі мен оның әлеуметтік желіде тудырған резонансы жайында болып отыр.
