Оқиға 15 тамызға қараған түні қаладағы көпқабатты үйлердің бірінде болған. Тұрғындар түн ортасындағы қатты шуға шағымданғаннан кейін, оқиға орнына полиция жасағы жеткен.
Пәтерде 40 жастағы үй иесі болған. Алдын ала мәліметке сүйенсек, әйел ішімдік ішкен мас күйде болған.
Тәртіп сақшыларының қоғамдық тәртіпті бұзбау туралы талабына ол агрессиямен жауап берген. Әйел балағат сөздер айтып, полицейлердің заңды талабын орындаудан бас тартқан, кейін олардың бірін жұлқылай бастаған.
Жанжал кіреберісте жалғасты. Пәтерден атып шыққан әйел полиция қызметкеріне тап беріп, оның беті мен мойнын тырнап тастаған. Бұл сәтті екінші полицей видеоға түсіріп алған.
Оқиғадан кейін әйелге қатысты сотқа дейінгі тергеу басталды. Құқық қорғау органдары болған жайттың барлық мән-жайын анықтап, оның әрекетіне құқықтық баға беруі тиіс.
Тергеу мүддесіне орай өзге ақпарат әзірге жарияланбайды.
