Оңтүстік Корея президенті Ли Чжэ Мён солтүстіккореялық тарапқа тікелей диалогқа көшуді және формалды түрде жеті онжылдықтан астам уақытқа созылған қақтығысқа біржола нүкте қою мүмкіндігін талқылауды ұсынды.
Корей соғысы 1953 жылы уақытша бітім туралы келісімге қол қоюмен аяқталған болатын. Тараптар арасында толыққанды бейбітшілік келісімшарты жасалмағандықтан, заң жүзінде соғыс жағдайы әлі күнге дейін жойылған жоқ.
Оңтүстік Корея президентінің пікірінше, қарым-қатынастың қазіргі моделін өзгертетін кез баяғыда жеткен. Тұрақты текетірестің орнына Сеул қарулы қақтығыс ықтималдығын азайтуға және біртіндеп бейбіт қатар өмір сүруге көшуге мүмкіндік беретін жүйе құруды ұсынып отыр.
Сонымен қатар Ли Чжэ Мён келіссөздерде аймақтағы ең күрделі мәселелердің бірі – КХДР-дың ядролық бағдарламасын талқылауды ұсынады. Сөз Пхеньянның ядролық әлеуетін одан әрі арттыруды тоқтата алатын тетіктерді іздеу туралы болып отыр.
Оңтүстік Корея көшбасшысы, сондай-ақ, өзара қоқан-лоққы жасаудан бас тартуға шақырды. Сеул шиеленісті бірте-бірте бәсеңдетуге және кезекті дағдарыстың әскери қақтығысқа ұласып кетуіне жол бермейтін қосымша қауіпсіздік тетіктерін құруға дайын екенін мәлімдеді.
Дегенмен жылдам диалог орнайды деп күту әзірге қиын. Екі Корея арасындағы қарым-қатынас өте шиеленісті күйде қалып отыр, ал Пхеньян бұған дейін де Оңтүстік Корея билігінің байланысты қайта жаңғырту туралы бастамаларын кері қайтарған болатын.
КХДР сонымен қатар Оңтүстік Корея мен АҚШ-тың бірлескен әскери жаттығуларын өзінің қауіпсіздігіне қатер ретінде қарастырып, оларға қарсылығын жалғастырып келеді.
Сеулдің жаңа бастамасына Пхеньян әзірге жауап қатқан жоқ.
