Ол журналистердің өз кәсіби қызметі аясында «Масс-медиа туралы» заңға сәйкес фото, аудио және бейнетүсірілім жасауға, сондай-ақ ақпарат таратуға құқылы екенін атап өтті.
«Ең алдымен, журналистер мен блогерлердің өз қызметін атқаруға, оның ішінде фото және бейнекескінге түсіруге толық құқығы бар екенін еске саламын», — деді Аида Балаева.
Оның айтуынша, кейбір жағдайларда бейнеленген адамның келісімінсіз де түсірілім жүргізуге болады. Бұл қоғамдық іс-шараларға, адамның қызметтік немесе қоғамдық жұмысы туралы ақпарат таратуға, сондай-ақ қоғамдық тәртіпті сақтауға байланысты жағдайларға қатысты.
Сонымен қатар министр БАҚ өкілдері, журналистер, белсенділер мен блогерлердің аккаунттары жаппай бұғатталып жатыр деген қауесетке жеке тоқталып өтті.
«Мәдениет және ақпарат министрлігі әлеуметтік желі қолданушыларының, оның ішінде БАҚ пен журналистердің аккаунттарын бұғаттамайды. Оның үстіне, мемлекет мұндай әрекеттерге және сөз бен пікір еркіндігін шектеуге мүдделі емес», — деп атап өтті ол.
Аида Балаева журналистер мен блогерлердің кәсіби қызметін немесе сөз бостандығын негізсіз шектеу медиа өкілдеріне ғана емес, мемлекеттік органдарға да нұқсан келтіретінін баса айтты.
Дегенмен министр БАҚ өкілдері мен блогерлерді сөз бостандығы мен таратылатын ақпарат үшін жауапкершілік арасындағы теңгерімді сақтауға шақырды.
«Сөз бостандығы таратылатын ақпаратқа жауапкершілікпен қарауды талап етеді. Бір адамның құқығы екінші бір адамның құқығын бұзу есебінен жүзеге аспауы тиіс, ал қоғамдық мәртебе ешкімді заң талаптарын орындаудан босатпайды», — деді ол.
Аида Балаева ақпаратты жарияламас бұрын оның рас-өтірігін тексеру қажеттігіне ерекше назар аударып, әлеуметтік желілер мен онлайн-платформаларды заңсыз контентті белсенді түрде анықтап, жоюға шақырды. Сонымен бірге, оның сөзінше, мұндай контентпен күрес сөз бостандығын негізсіз шектеуге әкеп соқпауы керек.
«Кәсіби журналистер мен блогерлер қызметінің ең басты қағидатын есте ұстаған жөн: таратылатын ақпараттың шынайылығы міндетті түрде тексерілуі қажет», — деп баса айтты министр.
Сөз соңында ол БАҚ өкілдері мен блогерлерді «ақпарат көздерін тексеруге және масс-медиа, онлайн-платформалар мен сайлау туралы заңнаманың бұзылуына жол бермеуге» шақырды.
