Таңғы сағат 10:00-ге белгіленген тыңдалым басты айыпталушының қатысуынсыз басталды. Залда тек жәбірленушілер, прокурор және қорғаушы тарап қана болды. Бір қызығы, түске дейін процеске қатысушыларға да, БАҚ өкілдеріне де журналистің сотқа келмеуінің нақты себебі айтылған жоқ. Ақыры судья отырысты белгісіз мерзімге шегеру туралы шешім қабылдады.
Естеріңізге сала кетейік, қазір істі қарау сот жарыссөзіне жеткен. Осыған дейінгі 14 тамызда өткен отырыста мемлекеттік айыптаушы Бажкенованы барлық баптар бойынша кінәлі деп тауып, жазасын өтеуді екі жылға кейінге қалдыра отырып, жалпы алғанда сегіз жылға бас бостандығынан айыруды сұраған еді.
Жарыссөз өткен аптада жәбірленуші Мақсат Ғаниев сөйлеп жатқан кезде үзілген болатын. Ол сөзінің үштен бір бөлігін айтып үлгерген тұста, айпталушы өзін жайсыз сезініп тұрғанына шағымданған. Шағын үзілістен кейін судья адвокатқа Бажкенованың 17 тамыздағы отырысқа міндетті түрде қатысуын қамтамасыз етуді жүктегенімен, бүгін ол тағы да төбе көрсетпеді.
Айта кетейік, бұл – журналистің сотқа бірінші рет келмей қалуы емес. Ол 11 тамыздағы отырысқа да қатыспаған еді, сол кезде сот оны мәжбүрлеп әкелу туралы қаулы да шығарған.
Сот ісінің нақты қашан жалғасатыны әзірге белгісіз.
