Америкалық теңізшілердің бірі түсіргені болжанып отырған кадрлардан кемедегі санитарлық бөлмелерді көруге болады. Видео авторы істен шыққан әрі бітеліп қалған әжетханаларды көрсетіп, борттағы тұрмыс жағдайының өте ауыр екеніне шағымданған.
Бұл бейнежазба USS Abraham Lincoln кемесіндегі түрлі мәселелер туралы көптеген ақпараттар тараған тұста жарияланып отыр. Мәліметтерге сүйенсек, онда сантехника бұзылып, жуынатын бөлмелерді зең басқан. Сондай-ақ ыстық су жиі өшіп, кейбір азық-түлік пен бірінші кезектегі қажетті заттардың тапшылығы сезілуде.
Бұл жағдай кеменің теңізде әдеттегіден тым ұзақ уақыт жүруімен де байланысты болып отыр. USS Abraham Lincoln Таяу Шығыста ұзақ мерзімді миссиясын өтеп, Иран бағытындағы жұмыстарға жұмылдырылған.
Экипаждың өмір сүру жағдайы америкалық заң шығарушылардың да назарына ілікті. Олар әскери басшылықтан мән-жайды түсіндіруді және теңізде ұзақ уақыт жүрген теңізшілердің жағдайына баға беруді талап етті.
Өз кезегінде Пентагон авиатасымалдағыштағы ахуал туралы ақпараттың бұрмаланғанын мәлімдеді. Америкалық әскери басшылық экипаж барлық қажетті жағдаймен қамтамасыз етілгенін алға тартып отыр.
Осы тұста аталған аймаққа USS Abraham Lincoln-ді алмастыру үшін USS George Washington авиатасымалдағышы бағыт алды.
