Қадағалау органының басшысы өзінің Х желісіндегі парақшасында жазғандай, бүгінде құқық қорғау органдарының жұмыс тәсілдері түбегейлі өзгеруде. Ендігі кезекте басты назар жасалып қойған қылмысты ашуға ғана емес, оның алдын алуға аударылып отыр.
Бұл бағытта жаңадан құрылған Қоғамдық қауіпсіздікке төнетін қылмыстық қауіп-қатерлер мен тәуекелдерді болжау орталығының рөлі зор. Орталық мамандары тәулік бойы криминогендік ахуалды талдап, әлеуетті қауіптер мен осал тұстарды анықтайды. Сондай-ақ қылмыстың жаңа түрлеріне дер кезінде төтеп беру үшін шетелдік контентке де тұрақты мониторинг жүргізіледі.
ІІМ және өңірлік әкімдіктермен бірлесіп, жасанды интеллект пен ұшқышсыз басқарылатын аппараттардың (дрон) көмегімен 360-тан астам қауіпті локация анықталды. Аталған аймақтарда патрульдеу күшейтіліп, 4 мыңға жуық жаңа жарықшам мен 3,5 мыңнан астам бейнебақылау камерасы орнатылды.
«Мұндай тәсіл өз нәтижесін беруде. Бірінші жартыжылдықтың қорытындысы бойынша елімізде қылмыс 11%-ға төмендеді. Кісі өлтіру, қарақшылық, тонау, бопсалау, ұрлық және көшедегі қылмыстар азайды», — деп атап өтті Берік Асылов.
Есірткі қылмысы мен киберқылмысқа қарсы күреске де ерекше көңіл бөлінуде. Мәселен, «Киберқадағалау» жүйесі есірткіні насихаттайтын 10 мың материалды, оның ішінде 6 мыңнан астам есірткі дүкенін бұғаттады. Құқық қорғаушылар 464 мыңнан астам дропперлік шоттың бұғатталуын қамтамасыз етіп, 2,6 млрд теңгеден астам сомадағы есірткі табысына бұғау салды.
Кейінгі жылдары алғаш рет интернет-алаяқтық саны 9%-ға төмендеп отыр. «Қазақтелеком» АҚ-мен бірлесіп, тәртіп сақшылары 1 миллионнан астам күдікті қоңырауды бұғаттап, шетелдік 12 алаяқтық колл-орталықтың қызметін тоқтатты.
Бас прокурор прокуратураның бастамасымен құрылған Антиколл-орталықтың жұмысынан нақты мысал келтірді: Астанада мамандар алаяқтардың қоңырауын дер кезінде үзіп, оларға 21 млн теңгесін бергелі тұрған 76 жастағы зейнеткерді аман алып қалды. Бұған қоса, Ұлттық банктің Антифрод-орталығы арқылы 2,9 млрд теңгеден астам сомаға күдікті транзакциялар бұғатталған.
«Бұл сандардың артында нақты нәтиже — азаматтардың қорғалған өмірі, денсаулығы мен мүлкі тұр», — деп түйіндеді Бас прокурор.
