Қазақстанда студенттерді жайлы баспанамен қамтамасыз ету жұмыстары қарқынды жүріп жатыр. Ғылым және жоғары білім министрі Саясат Нұрбек үкімет отырысында мәлімдегендей, биыл елімізде жалпы сыйымдылығы 6 857 орын болатын 18 жаңа жатақхананы пайдалануға беру жоспарланып отыр. Барлық нысандар жастардың қажеттіліктерін ескере отырып, заманауи форматта жабдықталуда.
Ең ірі нысандар елорда мен Алматы қалаларында ашылмақ. Мәселен, Астанада 22 тамыз күні Қазақ ұлттық спорт университетінің жанынан 1,5 мыңнан астам студентке шақталған екі жатақхана есігін айқара ашады.
Алматыда биыл Халықаралық білім беру корпорациясының 339 орындық жатақханасы қолданысқа берілді. Қазіргі уақытта тағы жеті нысанда құрылыс жұмыстары жүріп жатыр, ал жыл соңына дейін мегаполисте қосымша 11 жатақхана ашу жоспарланған. Оқу жылының басталуына орай қалада арнайы Ахуалдық және Дағдарыс орталықтары іске қосылды. Онда студенттер мен олардың ата-аналарына жатақханаға орналасу, қажетті құжаттарды жинау және өтініш беру тәртібі туралы толық ақпарат беріліп, бағыт-бағдар көрсетіледі.
Тұрмыстық мәселелерден бөлек, министр студенттердің кәсіби даму тақырыбына да тоқталды. Қазақстандық жоғары оқу орындары ірі жұмыс берушілермен серіктестікті белсенді түрде кеңейтуде. Атап айтқанда, жыл сайын 10 мыңға жуық студент «Самұрық-Қазына» қорының компанияларында дуальды оқытудан және өндірістік практикадан өтеді. Тек 2026 жылдың бірінші жартыжылдығының өзінде мұндай форматпен 4,3 мыңнан астам білім алушы қамтылды.
Тәжірибе экономиканың ең сұранысқа ие салаларында, яғни тау-кен ісі, энергетика, IT, электр техникасы, теміржол көлігі, телекоммуникация және цифрлық технологиялар бағыттары бойынша жүзеге асырылуда.
