Елордада полиция қаланың танымал көрікті жерінің фонында атышулы бейнеролик жариялаған өзге мемлекеттің азаматшасын жауапқа тартты. Бұл оқиға әлеуметтік желілерге мониторинг жүргізу барысында анықталды.
Астанада 25 жастағы шетелдік бойжеткен ұсақ бұзақылығы үшін әкімшілік жауапкершілікке тартылды. Ол Мәңгілік Ел даңғылындағы Салтанат қақпасының жанында түсірілген, былапыт сөздері бар видеоны TikTok желісіне жүктеген.
Полицейлер қыздың жеке басын анықтады — ол Ангелина Ванина. Іс материалдары сотқа жолданды.
Сот оған 20 АЕК мөлшерінде айыппұл тағайындады.
Полиция қоғамдық тәртіпті бұзу және қоғамдық орындарда қорлау сипатындағы контентті жариялау әкімшілік жауапкершілікке әкеп соғуы мүмкін екенін еске салды.
