Қайғылы оқиға 11 тамыз күні кешке Алматы – Шелек – Қорғас – Бәйсейіт тасжолында болған. Полиция департаментінің мәліметінше, Kia Sorento кроссоверінің жүргізушісі жолды рұқсат етілмеген жерден кесіп өтпек болған егде жастағы әйелді қағып кеткен. Соққыдан кейін жүргізуші қашып кеткенімен, көп ұзамай ұсталып, қамауға алынды.
Бұл жағдай әлеуметтік желілерде қызу талқыға түсті. Желі қолданушылары «Азаматтарға арналған үкімет» мемлекеттік корпорациясының облыстық филиалының басшылығы апатты жасырып қалмақ болды деп мәлімдеді: айтуларынша, қызметтік көлік бірнеше күн бойы тығылып, ал оқиға туралы ақпарат орталық аппаратқа берілмеген.
Мемлекеттік корпорация өкілдері жол-көлік оқиғасы болғанын растады. Ішкі қызметтік тексеріс қорытындысы бойынша филиал директоры мен оның орынбасары тәртіптік жауапкершілікке тартылды. Оған қызметтік көліктерге бақылаудың төмендігі мен ақпараттың тиісті деңгейде берілмеуі себеп болған.
Жүргізуші мен осы іске қатысы бар басқа да лауазымды тұлғалардың әрекетіне тергеу жұмыстарының қорытындысы бойынша нақты құқықтық баға беріледі.
