Орталық сайлау комиссиясы 23 тамызда өтетін Құрылтай депутаттарын сайлау кезінде басқа қалада, облыста немесе шет елде болатын азаматтардың қалай дауыс бере алатынын түсіндірді, деп хабарлайды SHYNDYK.KZ.
Тұрған жері бойынша дауыс беру үшін алдын ала есептен шығару куәлігін алу қажет. Бұл үшін өзіңіз тіркелген сайлау учаскесіне жазбаша өтініш беріп, жеке куәлігіңізді немесе төлқұжатыңызды көрсетуіңіз керек. Куәлікті 22 тамыз күні сағат 18:00-ге дейін алуға болады.
Есептен шығару куәлігін өзіңіз немесе сенімхат арқылы өкіліңіз ала алады. Ол үшін сенімхатты нотариуста растаудың қажеті жоқ.
Сайлау күні барған жеріңіздегі учаскеде есептен шығару куәлігі мен жеке басыңызды куәландыратын құжатты көрсетуіңіз қажет. Содан кейін сізді сайлаушылар тізіміне енгізіп, дауыс беру бюллетенін береді.
ОСК есептен шығару куәлігі жоғалған жағдайда қайта қалпына келтірілмейтінін және оның телнұсқасы (дубликат) берілмейтінін ескертті. Сондай-ақ бұл құжат бір елді мекен ішіндегі басқа учаскеде дауыс бергісі келетін сайлаушыларға берілмейді.
