Қалалық Полиция департаментінің мәліметінше, бір тәулік ішінде барлығы 2 092 жол қозғалысы ережесін бұзу фактісі тіркелген. Оның ішінде 249 дерек ауыр жол-көлік оқиғаларына әкеп соқтыруы мүмкін өрескел заңбұзушылықтар санатына жатады.
Рейд барысында ішімдік ішіп рөлге отырған 7 жүргізуші ұсталса, тағы 71 адамның қауіпті маневр жасап, жолақты рұқсатсыз ауыстырғаны белгілі болды. Он көлік иесі қарсы бағытқа шығып, жол ережесін өрескел бұзған. Бұдан бөлек, көлік жүргізу кезінде смартфон қолданған 26 адам мен қауіпсіздік белдігін тағуды ескермеген 126 азамат әкімшілік жауапкершілікке тартылды.
Сондай-ақ, заңды белінен басқан өрескел деректер де кездесті: бір азамат жүргізуші куәлігінен айырылғанына қарамастан көлік тізгіндесе, енді бір автокөліктен жалған мемлекеттік нөмір табылған. Тәуліктік тексеріс қорытындысы бойынша 23 көлік мамандандырылған айып тұрағына қойылды. Құқық қорғау органдары қаладағы рейдтік бақылау тәулік бойы жалғасатынын айтып, тұрғындарды жол қауіпсіздігін қатаң сақтауға шақырды.
