Марқұмның туыстарының айтуынша, қайғылы оқиға 2026 жылғы 30 сәуірде Ақбұлақ және Дарабоз шағынаудандарының маңында болған. Жастар арасындағы жаппай төбелестен кәмелетке толмаған екі бала қаза тапқан. Солардың бірі – Дінмұхамед.
Жасөспірімнің жақындары жанжалға дейін одан ұзақ уақыт бойы ақша бопсаланғанын айтады. Олардың сөзінше, Әкежан есімді жас жігіт қыс мезгілінен бері Дінмұхамедтен апта сайын 5 мың теңге талап етіп отырған. Қайғылы оқиғадан бір апта бұрын ол әпкесіне ақша бопсалаудың құрбаны болғанын айтып, жағдайдың соңы жаман бола ма деп қорқатынын жеткізген. Алайда мәселені өзі шешуге үміттеніп, бұл туралы ешкімге хабарламауды өтінген.
30 сәуірде Дінмұхамедті «сөйлесуге» шақырған. Кездесу орнына бір топ жас жиналып, сөзге келу көп ұзамай төбелеске ұласқан. Сол жерде жасөспірім бірнеше жерінен пышақ жарақатын алған.
Жараланған Дінмұхамед қашып құтылуға тырысып, есігі ашық тұрған үйге жеткен. Ол жедел жәрдемді сол жерде күткен. Алайда алған жарақаттары тым ауыр болып, жасөспірім көз жұмған.
Марқұмның отбасы қайғылы оқиғадан кейін күдіктінің туыстары әлеуметтік желілерде оны ақтауға және кінәні Дінмұхамедтің өзіне аударуға тырысқан жазбалар тарата бастағанын айтады. Бұл жағдай отбасының қайғысын одан әрі ауырлата түскен.
Туыстары Дінмұхамедті еңбекқор, адал әрі жанашыр жан болған деп еске алады. Олардың айтуынша, ол үлкендерге үнемі қолғабыс етіп, адал еңбегімен табыс тапқан.
Марқұмның жақындары мен қоғам өкілдері істің жан-жақты әрі бейтарап тергелуін және жасөспірімнің өліміне қатысы бар барлық адамның заң алдында жауап беруін талап етеді.
SHYNDYK.KZ редакциясы туыстары айтқан жайттарға қатысты ресми түсініктеме алу үшін Алматы қаласы Полиция департаментіне сауал жолдады. Қазір редакция жауап күтіп отыр.
