Партияның мәліметінше, бір ай бойы еліміздің барлық өңірінде 247 сайлауалды штаб жұмыс істеді. Кандидаттар мен үгіт-насихат топтарының мүшелері қала және ауыл тұрғындарымен кездесіп, кәсіпорындарды, базарлар мен қоғамдық орындарды аралады.
Науқанның негізгі жобаларының бірі – «Әділетті Қазақстан үшін» мобильді керуені болды. Құрылтай депутаттығына кандидат Армангүл Тоқтамұраттың айтуынша, керуен мүшелері 27 күн ішінде 13 872 шақырым жол жүріп, 17 облыстағы 99 елді мекенді аралаған. Олар 14 мыңға жуық тұрғынмен кездесті.
Сапарлардың қорытындысы бойынша партия өкілдері екі мыңнан астам ұсыныс жинады. «Әділет» партиясы азаматтардан түскен өтініштер мен ұсыныстар алдағы заңнамалық бастамаларды әзірлеу кезінде ескерілетінін мәлімдеді.
Партия төрағасы Айбек Дәдебай «Әділеттің» Президент бастаған реформалар бағыты мен жаңартылған Конституция қағидаттарын қолдайтынын атап өтті. Оның айтуынша, партияның басты міндеті – өңірлерде жылдар бойы қордаланған мәселелерді шешуге атсалысу.
Отырыста өңірлік штабтар атқарған жұмыстың нәтижелері де таныстырылды. Алматы қалалық штабының өкілі Дидарбек Ділдебектің айтуынша, мобильді топтар 1,36 миллион адамды қамтыған. Ал «Есіктен есікке» акциясы аясында 2,41 миллионнан астам тұрғынға ақпарат жеткізілген. Қалада таратылған үгіт-насихат материалдарының жалпы таралымы 6,2 миллион дананы құрады.
Жиында айтылған мәліметтерге сәйкес, Астанада 580 мыңнан астам адамды қамтыған 630-дан аса кездесу ұйымдастырылды. Шығыс Қазақстан облысында 314 мың тұрғынның қатысуымен екі мыңнан астам кездесу өтсе, Батыс Қазақстан облысында 430 мыңға жуық адамды қамтыған 1,6 мыңға жуық кездесу өткізілді.
Үгіт-насихат науқанының соңында партияның сенімді өкілдерінің саны 30 мыңға жетті. «STEM академиясы» компаниясының жетекшісі Залқарбек Мұраталиұлы кездесулер барысында партия өкілдері азаматтарды өз бағдарламаларымен таныстырып қана қоймай, тұрғындардың сауалдары мен ұсыныстарын да жинағанын айтты.
Партия өкілдері алдағы жұмыс сайлаушылардың аманат-тілектерін орындауға және 23 тамызға белгіленген дауыс беру күніне дайындық жүргізуге бағытталатынын хабарлады.
