«Байтақ» партиясының саяси басшылығын жаңарту қажеттігі туындады. Осындай мәлімдеме жасаған партия мүшесі Нұрлан Көптілеуов қазіргі төраға Азаматхан Әміртайдың жұмысын сынға алып, саяси ұйымның дамуына кедергі келтіріп отырған бірқатар кемшілікті атады.
Ол негізгі мәселелердің бірі ретінде экологиялық күн тәртібіне қатысты нақты шешімдердің жоқтығын көрсетті. Оның айтуынша, «Байтақ» Арал мен Балқаш мәселесін жиі көтергенімен, оны шешудің нақты тетіктері, қажетті ресурстар, жауапты мекемелер мен жүзеге асыру мерзімдері үнемі ұсыныла бермейді.
«Алайда мәселені көтерумен ғана шектелу жеткіліксіз. Экологиялық партия апат туралы дабыл қағып қана қоймай, оны шешудің нақты жол картасын да ұсынуға тиіс», – деп жазды ол Facebook әлеуметтік желісіндегі парақшасында.
Нұрлан Көптілеуов партияның саяси стратегиясына да сын айтты. Ол «Байтақтың» 2023 жылғы сайлауда Парламентке өте алмағанын еске салды. Оның пікірінше, бұл жіберілген қателіктерді жан-жақты саралап, стратегияны қайта қарауға негіз болуы керек еді. Алайда жазба авторы партия басшысының бұрынғы ұстанымы айтарлықтай өзгермегенін алға тартты.
«Бір сайлау кезеңі өтті. Сол кезде партия Парламентке өте алмады. Бұл нені дұрыс істемедік, стратегияда, қоғаммен байланыста және саяси көшбасшылық мәнерінде нені өзгерту қажет деген мәселелерді терең талдауға себеп болуы керек еді. Бірақ бүгін біз бұрынғы үлгінің қайталанғанын көрдік», – деді Нұрлан Көптілеуов.
Партия басшысының саяси пікір білдіру мәнері де сынға ұшырады. Көптілеуовтің пікірінше, Азаматхан Әміртайдың сөздерінде әлі де өткір әрі агрессивті риторика басым. Ал заманауи экологиялық саясат ғылымға, технологияға, экономикалық құралдарға, халықаралық ынтымақтастық пен ұзақ мерзімді жоспарлауға негізделуге тиіс.
«Бұл үшін эмоцияға толы сынның өзі жеткіліксіз. Бұл мәселені бізге айту әсіресе ауыр. Өйткені көпшілігіміз «Байтақ» партиясы құрылған алғашқы күннен бастап Азаматхан Әміртайдың жанында болдық. Партияның бастауында бірге тұрдық, оның идеясына сендік және Қазақстанда қуатты әрі заманауи экологиялық саяси күш пайда болғанын қаладық. Сондықтан партияның қазіргі нәтижесін көру бізге ауыр», – деді Көптілеуов.
Үндеуде партия басшылығының саяси жауапкершілігі мәселесі де көтерілді. Автордың пікірінше, партияда басшылықты ауыстырудың түсінікті әрі нақты тетіктері болуы керек. Саяси ұйым бір адамның жеке жобасына айналмауға тиіс.
«Бұл мәселеге қатысты ұстанымымыз айқын. Біз Азаматхан Әміртайға адам ретінде ешқандай кінә артпаймыз. Бірақ партия жетекшісі ретінде оған қояр сұрағымыз көп. Ол «Байтақты» қайда бастап барады? Біз партия басындағы адамның аты-жөнін жай ғана ауыстыруды талап етіп отырған жоқпыз. Біз саяси басшылықтың жаңаруын, жаңа көшбасшылардың келуін және партия мүшелері алдындағы жауапкершілік тетіктерінің қалыптасуын талап етеміз. Өйткені «Байтақ» бір адам үшін құрылған жоқ», – деді Нұрлан Көптілеуов.
Осыған байланысты ол партия төрағасын ауыстырумен ғана шектелмей, саяси басшылықты толық жаңартуды, жаңа көшбасшыларды тартуды және партия мүшелері алдындағы жауапкершіліктің нақты тетіктерін қалыптастыруды ұсынды.
