Партия көшбасшысы алғашқы Құрылтай сайлауын Қазақстанның саяси өміріндегі тарихи оқиға деп атап, сайлау үдерісі ашық әрі әділ өткенін айтты. Оның пікірінше, бұл – еліміздегі саяси жүйені жаңғырту бағытындағы маңызды қадам.
«Ақ жол» партиясының көшбасшысы партияның сайлауға жан-жақты дайындықпен, тәжірибелі командамен және елдің болашағына бағытталған жаңашыл идеялармен қатысқанын атап өтті. Сонымен қатар ол сайлау нәтижесін тек пайыздық көрсеткіш ретінде емес, партияға дауыс берген азаматтардың сенімі мен үмітінің көрінісі ретінде бағалайтынын жеткізді.
«Бүгінгі нәтиже біз үшін жай ғана пайыздық көрсеткіш емес. Оның артында «Ақ жолға» сенім артқан мыңдаған азаматтың үміті мен арманы, елдің болашағына деген нақты сенім тұр. Сондықтан бізге артылған сенімнің салмағын терең сезінеміз. «Ақ жолға» дауыс берген әрбір қазақстандықтың аманатын орындауға бар күш-жігерімізді саламыз. Сайлаушылардың сенімін ақтау – басты міндетіміз», – деді партия көшбасшысы.
Мәлімдемеде партияның алдағы жұмыс бағыттарына да тоқталды. Атап айтқанда, экономикасын күшейту, отандық өндірісті дамыту, кәсіпкерлікті қолдау, жаңа жұмыс орындарын ашу және халықтың әл-ауқатын арттыру мәселелері басым бағыттар ретінде аталды.
Партия көшбасшысы сайлаушылар қолдау білдірген саяси бағдарламаның әрбір тармағын жүзеге асыру үшін жұмыс жалғасатынын айтты.
Сондай-ақ ол «Ақ жолға» дауыс берген барлық азаматтарға ризашылығын білдіріп, әрбір дауыстың ел тағдырына деген азаматтық жауапкершіліктің көрінісі екенін атап өтті.
«Бізге сенім білдірген барша азаматқа шын жүректен алғыс айтамыз! Әрбір дауыс – ел тағдырына деген азаматтық жауапкершіліктің көрінісі», – деді ол.
Партия алдағы кезеңде де сайлаушылардың сенімін ақтап, елдің экономикалық және әлеуметтік дамуына бағытталған жұмыстарын жалғастыратынын мәлімдеді.
