Мемлекеттік қызметті Ішкі істер министрлігі Қазақстанның шетелдегі елшіліктері мен консулдықтары арқылы көрсетеді. Тиісті өзгерістер Сыртқы істер министрінің бұйрығымен бекітілген.
Шетелде паспорт рәсімдеуге мына санаттағы Қазақстан азаматтары өтініш бере алады:
- елден тыс жерде тұрақты тұратын, оқитын немесе жұмыс істейтін азаматтар;
- шетелде дүниеге келіп, Қазақстан азаматының паспортын алғаш рет рәсімдейтіндер;
- басқа мемлекетте тұратын, жұмыс істейтін немесе білім алып жүрген азаматтардың отбасы мүшелері;
- дипломатиялық қызмет атқарып жүрген азаматтар және олармен бірге тұратын отбасы мүшелері;
- денсаулық жағдайына немесе жасына байланысты өзіне-өзі қызмет көрсете алмайтын адамдар;
- тұрақты күтімді қажет ететін жақын туысына қарайтын азаматтар;
- шет мемлекетте ұсталған, қамауда отырған немесе жазасын өтеп жүрген қазақстандықтар.
Паспорттың дайындалу мерзімі шетелдегі мекеменің техникалық мүмкіндігіне байланысты болады. Егер елшілік немесе консулдық РП ДЗУ цифрлық жүйесіне қосылған болса, құжат 40 жұмыс күні ішінде рәсімделуге тиіс. Жүйеге қолжетімділік болмаған жағдайда бұл үдеріс 90 күнтізбелік күнге дейін созылуы мүмкін.
Құжат тапсыру үшін кезек күту уақыты 30 минуттан, ал өтініш берушіге қызмет көрсету мерзімі 10 минуттан аспауға тиіс.
Құжаттар тексерілгеннен кейін олардың түпнұсқалары иесіне қайтарылады. Егер өтініштен немесе оған қоса берілген материалдардан кемшілік анықталса, азаматқа оны түзету үшін уақыт беріледі. Бұл кезең мемлекеттік қызмет көрсетудің жалпы мерзіміне кірмейді.
Қателер түзетілгеннен кейін мерзімді есептеу жалғасады. Ал өтініш беруші анықталған кемшіліктерді белгіленген уақытта жоймаса, шетелдегі мекеме бас тарту себебін көрсете отырып, құжаттарды қабылдамауға құқылы.
14 жасқа толмаған, паспортты алғаш рет алатын және жеке сәйкестендіру нөмірі жоқ балалар үшін бөлек тәртіп қарастырылған. Мұндай жағдайда шетелдегі мекеме паспортпен қатар ЖСН рәсімдеу үдерісін де бастайды.
Дайын паспорт азаматтың өзіне немесе оның заңды өкіліне жеке келген кезде табысталады.
