Редакцияға жеткен мәліметке қарағанда, тойға жиналғандар «тентек кәде» жасап жатқан. Бұл рәсім кезінде қыз бен жігіт жағы бір-бірімен қалжыңдасып, түрлі тапсырма беріп, кәде сұрайды.
Сол сәтте жігіт жағынан келген қонақтардың бірі өзіне айтылған әзілді намысына тиген сөз деп қабылдаған. Екінші ер адам қалжыңын жалғастыра бергенде, ол кенет жұдырық жұмсаған.
Жарақат алған ер адам ауруханаға жеткізілді. Алдын ала мәлімет бойынша, соққыдан ол бірнеше тісінен айырылып, қабырғалары сынған. Оқиғаның жай-жапсары мен денсаулығына келген зиянның деңгейі анықталып жатыр.
«Тентек кәде» – Батыс Қазақстанға тән той ғұрыптарының бірі. «Қазақ тілінің аймақтық сөздігінде» бұл атау Орал мен Бөкей ордасы өңірінде күйеу жігіт келгенде сұралатын кәде ретінде берілген.
Қазір бұл дәстүр әр жерде әрқалай өтеді. Қыз жағы күйеу жігіттің немесе оның қасындағы серіктерінің жолын бөгеп, орындарына отырып алуы, қызықты тапсырма беріп немесе кәде сұрауы мүмкін. Мұның бәрі тойдың сәнін кіргізіп, құдандалы екі жақты етене араластыру үшін жасалады.
Ал күш қолданудың «тентек кәдеге» еш қатысы жоқ. Оралдағы оқиға салттың мазмұнынан емес, әзілді көтере алмаған адамның әрекетінен туындаған.
Материал жарияланған сәтте полиция бұл іске қатысты ресми ақпарат таратпады. Оқиғаға қандай құқықтық баға берілгені және оған қатысушылардың мәртебесі әзірге белгісіз. Редакция мән-жайды анықтауды жалғастырып жатыр.
