Бұған дейін электрлі самокат мінгендер тротуармен сағатына алты шақырымнан аспайтын жылдамдықпен жүре алатын. Басты талап – жаяу жүргіншілерге қауіп төндірмеу еді. Жаңа ереже күшіне енген соң бұл мүмкіндік те алынып тасталды.
Енді электрлі самокатпен веложолда немесе велосипедке арналған жолақта жүру керек. Мұндай жол болмаған жағдайда жолдың оң жақ шетімен бір қатарда қозғалуға рұқсат етіледі. Сондай-ақ маршруттық көліктерге арналған жолақты немесе жол жиегін пайдалануға болады.
Жолдың көлік жүретін бөлігіне 18 жасқа толған адам ғана шыға алады. Оның кез келген санаттағы жүргізуші куәлігі болуы шарт. Самокат мінген адам басына дулыға киіп, оның бауын бекітуге міндетті.
Қараңғы уақытта жолға шыққан адамның үстінде өзге жүргізушілерге анық көрінетін жарық шағылыстырғыш белгі болуы керек. Ол арнайы кеудеше, таспа, арқасөмке немесе жарық шағылыстырғыш бөлігі бар киім болуы мүмкін.
Жаяу жүргіншілер өткеліне келгенде самокаттан түсіп, оны қолмен жетектеп өту қажет. Бір самокатқа екі адамның мінуіне, жолаушы тасуға және басқаруға кедергі келтіретін жүк алып жүруге тыйым салынады.
Жалға берілетін самокаттарға да бөлек талап қойылды. 1 шілдеден бастап прокаттағы әр электрлі самокатқа тіркеу нөмірі беріледі. Сонымен бірге мұндай көлік азаматтық-құқықтық жауапкершілікті міндетті сақтандыру шарты болғанда ғана жолға жіберіледі.
Самокатты жалға беретін компанияларға мына міндеттер жүктеледі:
- самокаттардың техникалық жағдайын бақылау;
- қолданушының жеке басы мен жасын анықтау;
- жүргізуші куәлігінің бар-жоғын және көлік жүргізу құқығынан айырылмағанын тексеру;
- самокаттың жылдамдығы мен тұрған жерін қадағалау;
- арнайы қозғалыс тәртібі енгізілген аумақтарда жылдамдықты автоматты түрде шектеу;
- самокатты жаяу жүргіншілерге немесе көлік қозғалысына кедергі келтіретін жерге қоюға жол бермеу;
- заңда қарастырылған мәліметтерді ішкі істер органдарына беру.
Егер қолданушыда жүргізуші куәлігі болмаса, жалға беру сервисі оның жолдың көлік жүретін бөлігіне шығуына техникалық мүмкіндік бермеуге тиіс.
Жол ережесін бұзған самокат жүргізушісі әкімшілік жауапқа тартылады. Негізгі айыппұл мөлшері – 2 АЕК немесе 2026 жылғы есеппен 8 650 теңге. Бір жыл ішінде ереже қайта бұзылса, айыппұл 10 АЕК-ке, яғни 43 250 теңгеге дейін өседі.
Ал самокат жүргізушісінің әрекеті жол апатына әкеліп, адам денсаулығына немесе мүлікке зиян келтірсе, жауапкершілік күшейтіледі.
