Америкалық делегацияны АҚШ Өкілдер палатасының Бюджет және салық комитетінің төрағасы Джейсон Смит бастап келді. Оның құрамында конгрессмендер Грег Мерфи, Кэрол Миллер, Ронни Джексон, Уэсли Белл және Эдвард Кейс болды.
Меймандарды қарсы алған Қасым-Жомарт Тоқаев олардың сапары бір палаталы Құрылтай депутаттарының сайлауынан кейін өтуінің мәні айрықша екенін атап өтті. Президенттің айтуынша, өткен сайлау тарихи оқиғаға айналып, Қазақстандағы саяси жаңғырудың жаңа кезеңін бастап берді.
Мемлекет басшысы бір палаталы парламентке көшу заң шығару үдерісінің тиімділігін арттырып, заңнамалық жұмыстың сапасын жақсартуға тиіс екенін айтты. Құрылтай қызметінің маңызды бағыттарының бірі парламенттік дипломатияны дамыту болмақ.
«АҚШ Конгресі мен Құрылтай мүшелері арасындағы сындарлы әрі мазмұнды диалог өзара түсіністікті тереңдету, ортақ басымдықтарды ілгерілету және Қазақстан мен Америка арасындағы серіктестікті нығайту үшін аса маңызды», – деді Қасым-Жомарт Тоқаев.
Президент америкалық конгрессмендерге елімізде жүргізіліп жатқан саяси және әлеуметтік-экономикалық реформалар туралы да айтты. Ол мемлекеттік басқару жүйесін жаңғыртудың негізгі басымдықтарына және әділетті әрі озық мемлекет құруға бағытталған стратегиялық бағдарға арнайы тоқталды.
